KoKoLoRES – LA renkontiĝo por ludemuloj

12-a Kafoklaĉo Kaj Ludoj dum REnkontiĝo Semajnfina
3-a ĝis 7-a de oktobro 2012

(planita por 2013:
13-a KoKoLoREs 3-a ĝis 6-a de oktobro 2013)

Se vi ŝatas ludi, babili, renkonti homojn kaj viziti parton de la regiono Ruhrgebiet, venu al la KoKoLoRES en Herne  Alveno merkrede, la 3-a de oktobro, ekde la 17-a horo. Ni restos ĝis posttagmeze lunde, la 7-an de oktobro. La 3-a de oktobro estas nacia festotago en Germanio.

Herne situas 10 km norde de Bochum . La ejo de nia renkontiĝo, „Spielezentrum Herne“ , situas inter la urbocentroj. Ĝi estas facile atingebla per aŭto aŭ per la subtera tramo „U35“ inter la stacidomoj de Bochum kaj Herne. En tiu domo ni disponos pri granda kuirejo, tri ĉambroj kun litoj (bv. kunporti dormosakon aŭ litotukojn) kaj aliaj salonoj por ludi. Ni komune kuiras niajn manĝaĵojn.

Kompreneble ni havos multajn ludojn, kafon, kukon & klaĉon. Ĉu vi havas ludojn, muzikon, (lum)bildojn ktp, kiujn vi ŝatas prezenti? Ne hezitu kunporti ilin!

Ni sabate posttagmeze ekskursos, la loko estas decidata.

Geografiaj koordinatoj

Por via navigilo (GPS): +51.529550, +7.223960 aŭ 51,52955°N  7,223960°E aŭ 51° 31' 46,38"  7° 13' 26,26". Ligo al Google mapoj 

Vojpriskribo al la KoKoLoRES (se vi venas per aŭto)

La plej proksimaj aŭtoŝoseoj estas la A 42 kaj A 43 (mapo)  . Prenu de la A43 la elirejon numero 15 (Herne-Eickel)  kaj veturu orienten al Herne-Mitte laŭ la strato L657 (Holsterhauser Straße). Post ĉ. 1,5 kilometroj turnu dekstren kaj sekvu L551 (Westring) ĝis granda vojkruco (kun Bochumer Straße; maldekstre estas piediranta zono). Pluveturu rekten, sekvante la ringon kiu nun nomiĝas Hölkeskampring . La dua strato dekstre (kaj la unua maldekstre) estas Jean-Vogel-Straße. Ne enveturu ĝin, sed pluveturu ankoraŭ 20 m kaj maldekstre surveturu la parkejon de la domo, en tiu flanko estas la enirejo de la renkontiĝo. Nia domo estas sur mapopeco G5  dekstre sube. Estas ruĝa domo apud nigra domsimbolo kun blanka J.
De aliaj direktoj helpas la Superrigarda mapopecaro de Herne .

Vojpriskribo al la KoKoLoRES (se vi venas per trajno)

Veturi trajne ĝis unu el la jenaj stacidomoj: Bochum Hbf (ofte plej taŭgas), Herne Hbf aŭ Wanne-Eickel Hbf.

De la stacidomo Bochum Hbf, prenu la subteran tramon U35 al Herne (finhaltejo: „Schloß Strünkede“). Veturu ĝis la oka haltejo („Hölkeskampring“).

De la stacidomo en Herne (Herne Bf), prenu la saman subteran tramon U35 al Bochum (finhaltejo: „Hustadt“). Eliru ĉe „Hölkeskampring“, la tria haltejo.
Vi ankaŭ povas uzi buson de la linio 312, vidu tuj sube.

Alveninte al la stacidomo en Wanne-Eickel (kiu jam apartenas al Herne), aŭ veturu per loka trajno („S-Bahn“) tra la stacidomo de Herne (Herne Bf), aŭ prenu rektan buson de la linio 312 (direkto: „HERNE/Vörde-/Bergstr.“) ĝis „Marienhospital/Jean-Vogel-Straße“.

• Hejmpaĝo de la publikaj transportiloj en la trafikozono Rhein-Ruhr (VRR) 
• Mapo de la publikaj transportiloj en Herne  (formato PDF, 450 kB)
• Mapo de la publikaj transportiloj en la tuta Ruhr-regiono  (formato PDF, 350 kB)
• ligo al mapoj de lokaj trajnoj en la tuta regiono kaj la federacia lando Nordrhein-Westfalen  (PDF)

De la subtera tramstacio „Hölkeskampring“

La stacio havas diversajn elirejojn. Starante ankoraŭ sur la kajo subtere, rigardu la vojindikojn kaj prenu la elirejon „Jean-Vogel-Straße“. Tiu elirejo mankas en la mapo. Laŭiru tiun straton ĝis domnumero 17. Tiu domo, en la angulo al la strato „Hölkeskampring“, estas la ejo de nia renkontiĝo. La enirejo estas je la malantaŭa flanko de la domo, kie estas la parkejo.

Pliajn detalojn vidu sur mapo de Herne . La stacidomo Herne estas sur peco G4 , kaj nian domon vi trovas sur peco G5  dekstre sube. Estas la domo kun blanka J.

Kelkaj ŝpareblecoj veturante trajne al nia renkontiĝo

Je sabato aŭ dimanĉo: „ Schönes-Wochenende-Ticket“ .
Je lundo ĝis vendredo, ankaŭ se estas festotago: „ Quer-durchs-Land-Ticket“ .
De la federacia lando Nordrhein-Westfalen mem: „ SchönerTagTicket“ ,.
Validas en ĉiuj lokaj trajnoj, kaj en metroo, tramoj kaj busoj en la regiono.

Aliĝon kun la kutimaj informoj sendu al:
Petra Dückershoff
Auf der Panne 74 a
D-44805 Bochum
retpoŝto: petra.dueckershoff@esperanto.de
Telefono (hejme): +49-(0)234-380740
Poŝtelefono de Petra: +49-(0)151-14438074. Reto: D1. Ankaŭ dum la renkontiĝo.

Adreso de la ejo: Spielezentrum Herne, Jean-Vogel-Str. 17, 44625 Herne.
Retpaĝo de la ejo (germane/angle): http://www.spielezentrum.de 

La kotizo de po 13,00 € por nokto inkluzivas tranoktadon kaj manĝaĵojn. Beboj laŭ interkonsento. Tagaj vizitantoj pagu po 3,00 € por tago, inkluzive manĝaĵoj. La kotizon sufiĉas pagi alveninte, sed bv. nepre aliĝi por esti certa ke restas litoj kaj sufiĉe da manĝo por vi. Teo kaj kafo estas inkluzivaj, bieron ni finkalkulas laŭ strekolisto. Ni poste dissendos adresliston al ĉiuj partoprenintoj, krom se vi indikas ke vi ne volas aperi tie.

Venu kaj ĝuu!

P.S.: Ne forgesu:

• aliĝi
• kunporti litotukojn (aŭ dormosakon) se vi havas konfirmon pri lito
• kunporti matracon kaj dormosakon, se vi ne scias ĉu estas lito por vi!
• kunporti ludojn kaj bonan humoron
• je vendredo ne alveni antaŭ la 17-a horo
• ke la enirejo de la renkontiĝo estas malantaŭ la domo

Tiu ĉi paĝo: www.krokodilo.de/kokolores/kokolores.php, aŭ pli facile memorebla: esperanto.de/kokolores

lasta aktualigo: 24-a de decembro 2011